 |
|
|
|
|
|||
|
|
Archives « les Veillées Patoisantes »
|
|||||
| Les derniers textes mis en ligne : |
© VPT 2003
| SOUV'NIR ED MES NOELS A nou majon, in fêtot l'nouvel an inveuc el's amisses, mais à Noël, in s'artreuvot en famile et ch'étot sacré. In n'parlot pos du père Noël, les p'tits afants du Nord y fêtotent l'six déchimp'el grand saint Nicolas, qu'étot l'patron des infants saches, et qui passot pindant l'nut pou donner in p'tit jeuet à ceusses qui l'avottent mérité. Noël, ch'étot surtout l'crèche et l'pétit Jésus. L'vingt quat' déchimp', in allot tcheur dins l'fond du guerni, inn' grant' tchaisse d'ù qu'in avot armisé tous l'z'affaires des Noëls passés; in artreuvot l'pétit baudet qui n'avot pus foqu'inn' orelle, l'mouton qui tcheurot à tros pattes, inn'boule dorée qui n'avot pus d'dorure, du papi crèche qui avot acor deux ou trois bosses in puque... mais pou faire inn' grotte, ch'êtra acor mi ! In allot mett' tout cha sus l'buffet de l'salle à migi, et cha allot rester jusqu'à l'fin du mos d'janvi, bin après l'prom'nat des Ros Maches. Ch'l'ot toudis s'n homm' qui faijot touy cha inveuc mes p'tits afants, mi j'étos artenue dins l'tchusine, ou bin otcheupée à mett' mes bigoudis sus m'tête avant l'souper. In acoutot de bell meusique, les pus beaux Noëls ed tout les pays du monte et ch'étot pou nous in inchint'mint. Et pus, in artournot tous les tiroirs et les planques des armoires et in faijot des patchis inveuc des tas d'bell's affaires pou les p'tits afants qui n'avottent rin. Et après, in s'mettot à tafe pour in p'tit r'pas d'fête, mais ch'étot tout simp' et tout léger pou n'pos êt' malate à l'égliche. Inn'fos, in avot fait l'crèche vivante inveuc nous p'tits afants, yavot l'Saint' Vierche, Saint Joseph, el pétit Jésus, inn' bergère... mais qu'ch'étot beau ! Mais tchand qu'on a vu les photos, m'n homm'et mi, muchis pa derrire in faijot l'âne et l'boeuf, bin seur ! Et pus in s'in allot, toudis à l'avanche, à l'messe d'minut pou êt seur d'avoir inn' plache, mais tchand qu'in arrivot, l'égliche étot d'jà noirte d'montee et pleine à cratchi. Et là, j'arfais acor in pus grand bond in arrire, et j'm'arvos p'tit fill'... In étot là, in attindot, et tout d'inn' toutes les leumires y s'éteignottent, in silence, qui nous faijot peur tchéot sus nous têtes, in acoutot sonner les dousse ceups d'minut, et au douxim', comme cha, tout seu, à l'brenne au d'zeur ed tertous, inn' voisse s'él'vot qui tchantot Minuit Chrétiens... Cheulle voisse, ch'tot l'pus belle voisse du monte, vu qu'chétot cheulle d'min monpère. Min tcheur y s'mettot à batte comme si y-allot éclatchi, je m'prenos pou in anche, j'avos d'jà des ailes, j'étot dins l'paradis. Sitot l'cérémonie finie, in s'boustchulot pou aller vir tout près l'crèche qu'in avot arluqué d'lon pindint Ies priires. Y z'étottent tous là, grindeur nature, qui nous souriottent; in n'avot pos d'z'ys assez grands pou les vir, in jotchot l'bouque ouvert. J'arvos acor l'pétit anche inveuc es' corbelle, qui ballochot s'tête tchand qu'in mettot inn' piche, et pus qu'in mettot inn' piche, pus qu'y ballochot s'tête ! Et pus, in artournot à pids à nou majon, y faijot noir, y faijot frod, in étot mate, mais qu'in étot bénèche, eh bé mon Di, qu'in étot bénèche ! In marchot à l'badine pou s'récauffer inn' mioche et in sintot d'jà el bonne odeur ed chocolat caud et de l'grosse cotchille à chuc' et à rojins qui nous attindot au mitan de l'tafe. Ch'étot les pus beaux réveillons du monte. El temps y-a filé, mais dins min tcheur ces imaches y sont restées tell'mint leumineuses, aussi leumineuses qu' toutes l'z'étoiles qui brillottent dins l'ciel cheulle nut Ià. L'monte y-a tchangi, mais l'messache d'Noël y-est toudis l'même : 'Paix aux hommes de bonne volonté'. Pardonnez-mi si pour inn' fos, mais foqu'inn'fos, je n'sais pos vous l'dire in patos! L'fill à Joseph, Marie-Rose. Marie-Rose GOUDENOVE-OMEZ |
|
|
 | Achochonné au Picard dzeur ech Wépe [ Wépe d'avant |Wépe d'aprés |Comme cha t'ché |Liste] |
