 |
|
|
|
|
|||
|
|
Archives « les Veillées Patoisantes »
|
|||||
| Les derniers textes mis en ligne : |
© VPT 2003
| L' MUDJET Tchand qu'in s' rind compt' que l'temps i passe Tell'mint qu'in n' sait pus l'mesurer, Que des souv'nirs in n' d'a des masses Au point d' pus savoir les compter, Ch'est qu' les ain.nées défil'te vite Et qu'in n' sait pos les rattraper. Adan, in a l' tchoeur qui palpite Et in a plaiji à s' rapp'ler. Ainsin, ch' matin, dès min rével, J'ai fait in p'tit tour au gardin Et j' n'in cro.ïos pos mes orelles : Les mauvi.ards tchantot' t' fin bin, Du printemps chufflot' te l' messache Des beaux jours qui r'vin.n'te toudis. In est hureux à tous les z'âches Ed' vir que l'hiver i-est fini, Et, m'abachant pou mi les vir, J'ai découvert tros brins d'mudjet Qui, timid'mint, vénot'te dire : "Tout va acore arcommincher !" Ch'est ti, m'n homm', qui l'z avos plantés, N'pinsant nin partir avant eusses. J' t'arvos acor' m' les apporter. Eh bé, mon Di, qu' j'étos hureusse : Te m' donnos toudis les premis Et tchand qu' t' as pus été su terre, Nous afants i z'ont fait comm' ti, In savant bin qu' cha allot m' plaire. Adan, j'attinds el premi mai Et j'sais bin l' seurpriss' qu'i vont m'faire : Mes p'tits afants vont m'apporter El cadeau l' pus précieux de l' terre, Ch'ti qui m' rappell' les bons momints Et m' fait artreuver min sourire Du temps d' u qu'in s'aimot fin bin, Qu'in dijot rin, qu'in l' faijot vir. Et, tchand qu' l'odeur des p'tit' clochettes Venn'ra dins m' têt' tout armuer, J' t'arverrai d'zeure t 'mobylette, M'apportant el premi mudjet...... Nicole WYSTRAETE |
|
|
 | Achochonné au Picard dzeur ech Wépe [ Wépe d'avant |Wépe d'aprés |Comme cha t'ché |Liste] |
